Joh 18 | CAA | STEP | Pues entonces conda e Jesús cꞌapa ucꞌajti taca e Dios ixin taca uyajcanuarobꞌ esto teinxejr e cojn xeꞌ ucꞌabꞌa Cedrón. Y yajaꞌ ayan inteꞌ huerto tuaꞌ e teꞌ olivo. Entonces ixin ochoyobꞌ macuir e huerto era taca uyajcanuarobꞌ.

John 18

Conda uqꞌuechiobꞌ ixin e Jesús

Mateo 26:47-56; Marcos 14:43-50; Lucas 22:47-53

1 Pues entonces conda e Jesús cꞌapa ucꞌajti taca e Dios ixin taca uyajcanuarobꞌ esto teinxejr e cojn xeꞌ ucꞌabꞌa Cedrón. Y yajaꞌ ayan inteꞌ huerto tuaꞌ e teꞌ olivo. Entonces ixin ochoyobꞌ macuir e huerto era taca uyajcanuarobꞌ. 2 Pero e Judas xeꞌ ixin utuchꞌi e Jesús tut e ajcꞌamparobꞌ war unata ubꞌan tiaꞌ aquetpa e lugar era porque ya cay ixin e Jesús taca uyajcanuarobꞌ tama e lugar era. 3 Y tamar era cꞌotoy e Judas taca cora sian soldadobꞌ y taca cora sian policía tuaꞌ e templo xeꞌ ebꞌetbꞌir ixiobꞌ umen uwinquir e inmojr sacerdotiobꞌ y umen e fariseobꞌ. Y cꞌotoyobꞌ e winicobꞌ era taca e sian machit y taca e sian teꞌ tama ucꞌabꞌobꞌ, y war uqꞌuechiobꞌ axin ulamparobꞌ y war axiobꞌ taca meyra cꞌajc. 4 Pero e Jesús warix unata tunor lo que cꞌani anumuy y tamar era achpa locꞌoy y uyare e winicobꞌ y che:

—¿Y chi war isajca tara? che e Jesús.

5 Entonces ojronobꞌ e winicobꞌ y chenobꞌ:

—E Jesús xeꞌ tuaꞌ e chinam Nazaret, che e winicobꞌ era.

Y che e Jesús:

—Jax nen, che e Jesús.

Y e Judas xeꞌ war utuchꞌi e Jesús ya war tujam e winicobꞌ era ubꞌan. 6 Pero conda ojron e Jesús cocha era y che: “Jax nen”, ixiobꞌ tupatobꞌ y cucremobꞌ tut e rum tunorobꞌ. 7 Y ojron e Jesús otronyajr y che:

—¿Y chi war isajca?

Y che e winicobꞌ:

—E Jesús xeꞌ tuaꞌ e chinam Nazaret, che e winicobꞌ era.

8 Y che e Jesús:

—Inwareoxix que: “Jax nen”. Y jay nen war isicbꞌen actanic chicobꞌ tunor tin e turobꞌ taniwejtzꞌer era, che e Jesús.

9 Pues numuy tunor era tuaꞌ acꞌapa achempa lo que arobꞌna umen e Jesús que: “Mamajchi satpa tujam tin e ajcꞌunen umen Nitata”, que cay che e Jesús tama inyajr. 10 Pues ayan inteꞌ winic tujam e sian winicobꞌ era xeꞌ ucꞌabꞌa Malco xeꞌ jax inteꞌ man tuaꞌ e más nuquir winquir tuaꞌ e inmojr sacerdotiobꞌ. Y tujam uyajcanuarobꞌ e Jesús turu e Simón Pedro xeꞌ qꞌuecher umener inteꞌ umachit. Y tamar era e Pedro ujajpi umachit y usani tama ujor e Malco pero jax taca uchiquin ujuxi ojri esto tut e rum. 11 Pero wacchetaca e Jesús uyare e Pedro y che:

—Pedro, turbꞌan amachit tiaꞌ atajwi. ¿O war ca abꞌijnu que machi tuaꞌ innumse nibꞌa era? Pero bꞌan tuaꞌ anumuy porque Nitata bꞌan ucꞌani tuaꞌ inche, che e Jesús.

Conda qꞌuejcha ixin e Jesús tut e Anás

Mateo 26:57-58; Marcos 14:53-54; Lucas 22:54

12 Entonces e sian soldadobꞌ era y tin e quetpa ajcꞌotorer tujorobꞌ y cora sian policía xeꞌ tuobꞌ e templo ixin ucachiobꞌ e Jesús y uqꞌuechiobꞌ ixin. 13 Y bꞌajxan uqꞌuechiobꞌ ixin esto tama uyotot inteꞌ winic xeꞌ ucꞌabꞌa Anás. Y e Anás era jax upixam e Caifás xeꞌ jax e más nuquir winquir tuaꞌ e inmojr sacerdotiobꞌ tama e año yajaꞌ. 14 Pues e Caifás era jax tin e cay ojron bꞌajxan tut e nuquir winicobꞌ tama e chinam Jerusalem que más ani bueno que achamay inteꞌ taca winic tama tunor e chinam.

Conda e Pedro umuqui que machi unata chi e Jesús

Mateo 26:26-70; Marcos 14:66-68; Lucas 22:55-57

15 Entonces ixin e Pedro tupat e Jesús taca otronteꞌ ajcanuar. Y inteꞌ ajcanuar era acayix eꞌrna umen e nuquir winquir tuaꞌ e inmojr sacerdotiobꞌ, y tamar era actana ochoy macu tor e tinaj tupat e Jesús. 16 Pero e Pedro quetpa patir tupat e macteꞌ. Y tamar era locꞌoy inteꞌ ajcanuar tuaꞌ oꞌjron taca e ijchꞌoc xeꞌ war ucojco e puerta tuaꞌ uyacta oꞌchoy e Pedro. 17 Entonces ojron e ijchꞌoc era xeꞌ war ucojco e puerta y uyubꞌi tuaꞌ e Pedro y che:

—¿Ma ca jax net xeꞌ jax inteꞌ ajcanuar tuaꞌ e winic? che e ijchꞌoc era.

Pero e Pedro che:

—Nen machi, che e Pedro.

18 Y ayan meyra e sisar tama e acbꞌar era, y tamar era ayan cora manobꞌ y e policiobꞌ tuaꞌ e templo xeꞌ cay uxuniobꞌ inteꞌ cꞌajc tor e tinaj tuaꞌ aqꞌuixiobꞌ tamar. Y e Pedro ixin tuyejtzꞌer e cꞌajc tuaꞌ aqꞌuixi ubꞌan.

Conda e Anás cay uyubꞌi tuaꞌ e Jesús tucꞌa war uche

Mateo 26:59-66; Marcos 14:55-64; Lucas 22:66-71

19 Pues entonces e nuquir winquir tuaꞌ e inmojr sacerdotiobꞌ cay uyubꞌi tuaꞌ e Jesús que jayteꞌ uyajcanuarobꞌ y que tucꞌa tamar war acanseyan. 20 Y che e Jesús:

—Nen cay canseyanen tut tunor e gente tic taca y tama e sian sinagoga y tama e templo tara tama e chinam Jerusalem tiaꞌ acay umorojse ubꞌobꞌ tunor e gente tuaꞌ e Israel iraj iraj. Y tamar era erer inata que matucꞌa war incanseyan xeꞌ mucur. 21 ¿Y tucꞌa tuaꞌ war iyubꞌi tanibꞌa? Ubꞌinic tuaꞌ tunor e gente xeꞌ cay uyubꞌiobꞌ lo que incansiobꞌ. Jaxirobꞌ erer uyareox tucꞌa tamar cay canseyanen, che e Jesús.

22 Pero conda e Jesús cꞌapa ojron cocha era inteꞌ policía tuaꞌ e templo achpa y ixin uyajcꞌu tuyej e Jesús y che:

—Ira oꞌjron cocha era tut e nuquir winquir tuaꞌ e inmojr sacerdotiobꞌ, che e policía.

23 Y che e Jesús:

—¿O ayan ca lo que cay inware xeꞌ mabꞌambꞌan? Jay ayan, aren tunor e gente era tuaꞌ aquetpa chequer tutobꞌ lo que cay inware. Pero jay matucꞌa ¿tucꞌa tuaꞌ war awajqꞌuen era? che e Jesús.

24 Entonces e Anás uyebꞌta ixin e Jesús cacharto tut e Caifás xeꞌ jax uwinquir e inmojr sacerdotiobꞌ.

Conda e Pedro umuqui ucꞌabꞌa e Jesús

Mateo 26:71-75; Marcos 14:69-72; Lucas 22:58-62

25 Entonces conda turuto e Pedro war aqꞌuixi tuyejtzꞌer e cꞌajc ayan inteꞌ xeꞌ cay uyubꞌi tuaꞌ y che:

—¿Ma ca jax net xeꞌ jax inteꞌ ajcanuar tuaꞌ e winic era? che inteꞌ.

Pero e Pedro umuqui y che:

—Nen machi, che e Pedro.

26 Y ayan ubꞌan inteꞌ winic xeꞌ jax inteꞌ man tama uyotot e nuquir winquir tuaꞌ e inmojr sacerdotiobꞌ. Y e man era jax inteꞌ upiar e winic xeꞌ ojresna uchiquin umen e Pedro. Entonces ojron jaxir y che:

—¿Ma ca jax net xeꞌ inwiret taca e Jesús tama e huerto yajaꞌ? che e man era.

27 Pero e Pedro umuqui otronyajr y wacchetaca aru inteꞌ acꞌach.

Conda qꞌuejcha ixin e Jesús tut e Pilato

Mateo 27:1-2, 11-14; Marcos 15:1-5; Lucas 23:1-5

28 Pues entonces ulocsiobꞌ e Jesús tama uyotot e Caifás y uqꞌuechiobꞌ ixin esto tama e palacio tiaꞌ turu e gobernador romano. Y cꞌanix asacojpa tama e hora era conda tuaꞌ acay e nojqꞌuin pascua. Y tamar era e winicobꞌ tuaꞌ e Israel machi ochoyobꞌ tama e palacio umen que machi cꞌani ubꞌoni ubꞌobꞌ taca e choquem gente, porque jay bꞌan ani uchiobꞌ machi ani actanobꞌ tuaꞌ oꞌchoyobꞌ awiobꞌ tama e nojqꞌuin pascua era. 29 Y tamar era e gobernador xeꞌ ucꞌabꞌa Pilato locꞌoy tama uyotot tuaꞌ oꞌjron taca e winicobꞌ era y che:

—¿Y tucꞌa tamar war ituchꞌi e winic era? che e Pilato.

30 Y che e winicobꞌ:

—Jay ma ani tucꞌa war uche, machi ani war catares toit tuaꞌ cawajqꞌuet, che e winicobꞌ era.

31 Y che e Pilato:

—Qꞌuechic chic nox tuaꞌ ibꞌijnu iwira tama iley tibꞌa, che e Pilato.

Pero ojronobꞌ e winicobꞌ tuaꞌ e Israel otronyajr y chenobꞌ:

—Pero non xeꞌ tuon e Israel ma erer cachamse inteꞌ winic motor que ayan lo que war uche xeꞌ más intuj. Jax taca net xeꞌ erer aware tuaꞌ achamesna inteꞌ cocha era, che e winicobꞌ era.

32 Pues bꞌan numuy tuaꞌ acꞌapa achempa bꞌan cocha arobꞌna umen e Jesús que jaxir tuaꞌ achamay achꞌubꞌna tama ut inteꞌ cruz. 33 Entonces e Pilato sutpa ochoy macuir upalacio otronyajr y upejca e Jesús y uyubꞌi tuaꞌ:

—¿Net ca e rey tuaꞌ e gente tuaꞌ e Israel? che e Pilato.

34 Y che e Jesús:

—¿War ca abꞌijnu abꞌajner que nen jax inteꞌ rey? O ¿ayan ca chi xeꞌ war uyaret tamaren? che e Jesús.

35 Y che e Pilato:

—¿O war ca abꞌijnu que jaxen inteꞌ winic tuaꞌ e Israel? Porque jax taca apiarobꞌ tama alugar taca uwinquir e inmojr sacerdotiobꞌ xeꞌ uqꞌuechiet tariet taniut. ¿Y tucꞌa cay ache tacarobꞌ? che e Pilato.

36 Y che e Jesús:

—Pues tiaꞌ tuaꞌ incꞌotori majax tara tor e rum. Tara nic ani tuaꞌ incꞌotori ayan ani meyra tin e tuaꞌ axin atzꞌojyobꞌ tacaren tuaꞌ machi inqꞌuejcha inxin umen e gente tuaꞌ e Israel era. Pero majax tara tor e rum tuaꞌ incꞌotori era, che e Jesús.

37 Entonces e Pilato che:

—¿Erach ca que net reyet? che e Pilato.

Y e Jesús che:

—Nen jax inteꞌ rey bꞌan cocha war aware. Pues nen tarien tara tor e rum tuaꞌ incuxpa y tuaꞌ inchecsu tunor lo que erach tut e gente axin. Y tunor tin e uchiobꞌ lo que erach war uyubꞌienobꞌ, che e Jesús.

38 Y che e Pilato:

—¿O ayan ca lo que erach? che e Pilato.

Conda e Jesús arobꞌna que cꞌani achamesna

Mateo 27:15-31; Marcos 15:6-20; Lucas 23:13-25

Entonces conda cꞌapa uyubꞌi tuaꞌ e Jesús cocha era, e Pilato locꞌoy patir y cay ojron taca e winicobꞌ tuaꞌ e Israel y che:

—Nen matucꞌa intajwi tama e winic era. 39 Pero cocha nox cꞌayoxix que imbꞌani axin inteꞌ winic xeꞌ turu tama e cárcel tama inteꞌ inteꞌ nojqꞌuin pascua, ¿icꞌani ca tuaꞌ imbꞌani e winic era xeꞌ war iware que jax e rey tuaꞌ e gente tama e Israel? che e Pilato.

40 Pero cay aruobꞌ tunor e winicobꞌ taca inteꞌ nuxi nuc y chenobꞌ:

—Ira abꞌani e Jesús. Actan loqꞌuic e Barrabás, che e sian winicobꞌ era.

Pues e Barrabás era jax inteꞌ ajxujch.